Home / Habari Za Kitaifa / Tanzanite One sasa kuilipa fidia serikali

Tanzanite One sasa kuilipa fidia serikali

KAMPUNI ya uchimbaji madini ya Tanzanite One imekubali kuilipa serikali fi dia pamoja na kodi watakayokubaliana kutokana na dosari zilizokuwepo hapo awali. Makubaliano hayo yalitiwa saini jijini Dar es Salaam jana na Mwenyekiti wa Kamati iliyoundwa na Rais John Magufuli, Profesa Palamagamba Kabudi na Mkurugenzi wa Tanzanite One, Faisal Juma.

Akizungumza mara baada ya kutia saini makubaliano hayo, Profesa Kabudi alisema Tanzanite One imekubali kuilipa fidia serikali kutokana na mambo iliyofanya ambayo yalikuwa kinyume na utaratibu ulioleta hasara kwa serikali. Alisema fidia hiyo inatakiwa kulipwa kwa awamu ambapo awamu ya kwanza italipwa ndani ya wiki mbili kuanzia leo na haitahusisha kodi. Pia Kampuni hiyo Tanzanite One italazimika kulipa kodi kama kawaida inazodaiwa na serikali na tozo nyingine zote zinazodaiwa na serikali. Alisema pia serikali imekubaliana na Kampuni ya Tanzanite One kuwa itafuata masharti yote ya Sheria ya Madini ya Mwaka 2010 ambayo inaeleza kuwa ni Watanzania tu ndio wanaoruhusiwa kuchimba madini ya Vito na pale ambapo Watanzania hawana uwezo huo ndipo wanapoweza kuingia ubia na wageni.

Aidha, Profesa Kabudi alisema kuhusu wachimbaji wadogo wadogo wa Tanzanite katika eneo la Mirerani utaratibu mpya unawekwa lengo kubwa ikiwa ni kutekeleza Sheria ya Madini ya Mwaka 2010 ambayo inalenga madini ya Vito kuwa mikononi mwa Watanzania. Kwa upande wake, Mkurugenzi wa Kampuni ya Tanzanite One, Juma alimshukuru Rais Magufuli kwa kuunda kamati hiyo ya kizalendo katika kufuatilia rasilimali za madini nchini ambapo wameweza kujadiliana na kufikia muafaka wa kulipa fidia ikiwa ni mbali na malipo yote yaliyotakiwa kulipwa serikali ikiwemo kodi.

Alisema Tanzanite One itahakikisha inafuata taratibu zote za Sheria ya Madini ya Mwaka 2010 kwa lengo la kuhakikisha rasilimali ya madini inawanufaisha Watanzania na kwamba uvunjifu wa sheria uliofanywa na kampuni hiyo hautajirudia tena. “Sisi kama Tanzanite One tunaihakikishia serikali kuwa uaminifu uliotuonesha na sisi pia kama kampuni tutahakikisha tunakuwa waaminifu na kuwa zao hili linanufaisha taifa kutokana na imani aliyotuonesha Rais kama wananchi wake kutupa nafasi na fursa ya kusikilizwa ili kurekebisha makosa tuliyoyatenda,” alisema Faisal. Alisema Tanzanite One itahakikisha haitafanya makosa iliyofanya mara ya kwanza na hivyo kuwa mfano wa kampuni nyingine za madini kuhakikisha rasilimali za madini zinawanufaisha Watanzania.

About komaji

Naitwa Ramadhani Shabani Komaji , Ni kijana wa Kitanzania mwenye upendondo na Kila Mwanadamu , Amani upendo furaha ndiyo Faraja ya maisha yangu, Tovuti yetu inazungumzia mambo yote ya kijamii na Kiimani mwenye kupenda kuchangia maendeleo na uboreshaji wa Tovuti yetu twamkaribisha sana +255655004100

Check Also

WAGENI 8 MBARONI DODOMA

IDARA ya Uhamiaji mkoani Dodoma imewakamata na kuwashikilia raia wanane wa kigeni kwa makosa ya …

Leave a Reply

Your email address will not be published. Required fields are marked *