Home / Habari Za Kitaifa / WENYEVITI WA VIJIJI KILOSA MIKONONI MWA TAKUKURU.

WENYEVITI WA VIJIJI KILOSA MIKONONI MWA TAKUKURU.

MKUU wa Mkoa wa Morogoro, Dk Stephen Kebwe, ameliagiza jeshi la Polisi na Taasisi ya Kuzuia na Kupambana na Rushwa (TAKUKURU) wilayani Kilosa kuwachunguza wenyeviti wa serikali za vijiji, vitongoji na maofisa watendaji ili kubaini iwapo wamejilimbikizia mali zinazotokana na kupokea rushwa za wafugaji.

Alitoa agizo hilo kwenye mikutano ya hadhara iliyofanyika kwa nyakati tofauti katika vijiji vya Ulaya, Zombo na Kivungu wilayani humo wakati wa ziara yake ya kukagua shughuli za maendeleo ya wananchi na kubaini kuwepo kwa migogoro baina ya makundi hayo.

Kabla ya kutoa agizo hilo, Mkuu wa Wilaya ya Kilosa, Adam Mgoyi, alieleza mbele ya Mkuu wa Mkoa kuwa migogoro ya wakulima na wafugaji bado inaendelea katika maeneo mbalimbali wilayani humo.

Alisema migogoro ya aina hiyo kwa sasa ipo kwenye kata 14 za Kilangali, Ulaya, Masanze, Chanzuru, Rudewa, Msowero, Dumila, Kimamba, Magole, Mabwerebwere, Mikumi, Tindiga , Malolo na Zombo, zenye jumla ya vijiji 29.

Kutokana na hali hiyo, Mkuu wa Mkoa, aliitaka Kamati ya Ulinzi na Usalama ya wilaya kuwatumia Polisi na Takukuru kupita kila kijiji kuwachunguza wenyeviti wa vijiji, vitongoji na watendaji wao.

Alisema lengo la uchunguzi huo ni kuwabaini watendaji wa vijiji, wenyeviti wa vijiji na vitongoji wanatuhumiwa na wananchi kuchukua fedha za wafugaji na kuwaruhusu kuingia na mifugo yao katika vijiji bila kufuata utaratibu na idhini ya mikutano mikuu ya vijiji husika.

“Polisi na Takukuru anzeni na vijiji hivi 29 vilivyotajwa kuwa na migogoro ya mara kwa mara baina ya wakulima na wafugaji. “ Piteni kila kijiji muwachunguze Mwenyekiti wa kijiji, kitongoji na mtendaji wa kijiji ambao wametajwa na wananchi kwa tuhuma za kupokea fedha za wafugaji na kuwaruhusu waingie na mifugo yao na hatua za kisheria zichukuliwe kwa watakaobainika,” alisisitiza Dk Kebwe.

Awali, Mkuu wa Wilaya ya Kilosa, Mgoyi, alisema wilaya hiyo inaendelea na usajili na utambuzi wa mifugo ili kuwianisha idadi ya mifugo iliyopo na uwezo wa malisho.

Alisema hadi sasa wilaya imefanikiwa kusajili wafugaji 6,334 wenye jumla ya ng’ombe 176,031, mbuzi 122,948, kondoo 23, 436 na punda 2,258 katika maeneo mbalimbali wilayani humo, wakati ng’ombe wa asili wapatao 60,207 sawa na asilimia 34 wamepigwa chapa.

SOURCE HABARI LEO.

About komaji

Naitwa Ramadhani Shabani Komaji , Ni kijana wa Kitanzania mwenye upendondo na Kila Mwanadamu , Amani upendo furaha ndiyo Faraja ya maisha yangu, Tovuti yetu inazungumzia mambo yote ya kijamii na Kiimani mwenye kupenda kuchangia maendeleo na uboreshaji wa Tovuti yetu twamkaribisha sana +255655004100

Check Also

CCM YASHINDA UBUNGE, UDIWANI KWA 100%

CHAMA Cha Mapinduzi(CCM) kimeshinda kwa asilimia 100 kwenye uchaguzi mdogo wa Ubunge jimbo la Buyungu …

Leave a Reply

Your email address will not be published. Required fields are marked *